Ry fiets vir gratis aandete
2010-04-21 11:21
Kopenhagen - ‘n Deense hotel het met 'n blink idee opgekom om gaste vir hul eie kos te laat werk, en boonop omgewingsbewustheid te bevorder.
Die Crowne Plaza Copenhagen Towers, sowat 15 minute uit die Deense hoofstad, het twee oefenfietse geïnstalleer wat aan kragopwekkers gekoppel is.
Gaste word uitgenooi om op ‘n fiets te spring en te trap vir krag. Indien hulle genoeg elektrisiteit kan produseer, kry hulle ‘n gratis maaltyd.
“Enigeen wat 10 Watt-ure elektrisiteit of meer kan produseer, sal ‘n maaltyd verniet kry. Dit moedig gaste nie net aan om fiks te word nie, maar ook om elektrisiteit en geld te bespaar,” het die hotel in ‘n verklaring gesê.
Volgens Frederikke Tommergaard is die gratis maaltyd net van toepassing op gaste wat by die hotel ingeboek is.
Die waarde van die maaltyd, wat enigeen van die hoofdisse van die restaurant kan wees, is sowat 240 Deense krone (rondom R300).
Die elektriese fietse sal vanaf 19 April beskikbaar wees. Die plan is om die idee vir ‘n jaar te toets, met die einddoel om dit na ander hotelle in die InterContinental-groep uit te brei.
- Reuters