Ry deur Meiringspoort
2011-01-26 09:27
Klaarstroom is in die Groot Karoo by die noordelike ingang na Meiringspoort, met De Rust aan die Klein-Karoo se kant.
Klaarstroom is ’n rustige plekkie. Hier’s net een gastehuis, een winkel en een worshond, wat ek gou ontmoet. Gaan sit gerus teen sononder op die rantjie direk agter die dorp en kyk hoe die son na die suide toe minder raak teen die Swartberg.
Nou is dit egter vroegoggend en met my gastehuisontbyt in die maag ry ek Meiringspoort toe. By die N12, met die Poort-Pourri- snuisterywinkel aan die linkerkant, druk ek die odometer op 0,0.
Meiringspoort is ’n korterige poort, want ná skaars 23 km is jy al op De Rust. Maar jy kan ’n dag in dié kloof deurbring. En jy móét dit van al twee kante af ry, want party van die mooiste stopplekke is net aan die een kant van die pad.
Die N12 is ’n hoofslagaar, eintlik meer ’n dunderm, want sonder die N12 het die Groot-Karoo se verkeer nêrens om heen te dreineer nie.
Gou gewaar ek die Grootrivier regs van my. By Eerste Drif trek ek af op ’n platgemaakte hoop sand en klip. Hier was duidelik onlangs weer ’n vloed deur, want 3 m teen die kransie op sien jy opdrifsels.
Ek kyk na spore in die sand. Een stel het naels – dalk ’n kommetjiegatmuishond wat hier kom snuffel het vir krappe. ’n Ander het geen naels nie en is groter – dalk ’n groototter.
Daar’s ook mensspore, vrouetekkies, dalk ’n netbalspeler op wintertoer.
Die spoelklippe, in elke denkbare kleur en tekstuur, kom van ver af, van oral in die Karoo. Dis ’n klipbiblioteek.
Vir die volledige storie en nuttige inligting oor Meiringspoort, besoek: Weg! se webblad.