Resigers sal 'kaal-skandeerders' nie kan vermy
2011-11-25 15:23
Londen – Reisigers wat vanuit Britse lughawens vertrek sal álmal deur skandeerders moet loop wat heeltemal deur hul klere kan sien, ten spyte van beloftes deur owerhede in Europa dat 'n mens sal kan kies om dié skandeerders te vermy.
Die Britse regering het bevestig dat die skandeerders op álle reisigers gebruik sal word.
Die Europese Unie het verlede Woensdag met 'n wetsontwerp vorendag gekom wat passassiers 'n basiese reg tot privaatheid sal gee, insluitend die reg om dié skanderings te weier.
Justine Greening, die Britse minister van vervoer, het egter Maandag in die parlement gesê daar sal geen alternatief wees vir reisigers vanuit die Verenigde Koninkryk nie.
"Ek het oorweeg of daar alternatiewe deursoekmetodes is wat soortgelyke sekerheidsvlakke as 'n skandering kan bied," het sy gesê.
"'n Volledige privaatdeursoeking – wat die losmaak en/of verwydering van kledingstukke in die teenwoordigheid van sekerheidspersoneel in 'n privaat kamer insluit – bied 'n redelike vlak van gerusstelling. Ek glo egter dit verteenwoordig waarskynlik 'n groter skending van privaatheid as 'n sekerheidskandering".
– Lees hier meer.
– Volg Nuus24 op Twitter.