Reksprong veilig, wys Zambiese minister
2012-01-12 11:16
Zambië se minister van toerisme, Given Lubinda, het 'n reksprong van die Victoria-watervalbrug af gedoen – net om te bewys dié aktiwiteit is nie werklik gevaarlik nie.
Die vreeslose Lubinda het dié stap geneem ná Erin Laung Worth (22) van Australië op Oujaarsdag beseer is toe die rek tydens haar sprong gebreek het, berig die Daily Mail.
Die brug staan 110 m bo die rivier, op die grens van Zimbabwe en Zambië.
Lubinda het gesê hy glo steeds vas reksprong is veilig, en dat die ongeluk net 'n eenmalige gebeurtenis was.
"Ek sal self met die operateur beraadslaag oor hoe ons hierdie opwindende toeriste-aktiwiteit heeltemal ongelukvry kan maak," het hy ná sy sprong gesê.
Die operateur het intussen gesê die rek wat tydens Worth se sprong gebreek het, is na Suid-Afrika gestuur om getoets te word.
Mike Davies, hoof van die Safari Par Excellence-reismaatskappy, wat volgens berigte die reksprong gereël het, het gesê die ongeluk was 'n "eenmalige" gebeurtenis, en het bygevoeg dat 'n volskaalse ondersoek van stapel gestuur is.
Hy het aan New Zimbabwe gesê: Daar het oor die laaste 17 jaar 150 000 mense gespring sonder 'n enkele voorval."
– Lees hier meer.
– Volg Nuus24 op Twitter.