Reisplanne: Dis wat kenners voorspel vir 2011
2010-11-23 10:45
Londen – Van Twitter as ‘n reisgids tot ‘n ski-vakansie in Serwië, kenners in die toerismebedryf het met ‘n paar verrassende voorspellings vorendag gekom vir toerisme in 2011.
Sneeuliefhebbers sal hul ski’s vir Oos-Europa pak, meet Gareth Williams van Skyscanner, met dun beursies ná die resessie wat reisigers weghou van duurder oorde in Wes-Europa en die VSA.
“Serwië het reeds ‘n groei van 130% gesien,” sê Williams, met die ski-oord Kopaonik wat skivakansies vir minder as ‘n derde van die prys van die Franse Alpe aanbied.
Volgende jaar sal ook ‘n toename in avontuurtoerisme sien, meen Luke Errington van Swoop Travel in Patagonië.
Williams en Errington is dit ook eens dat Suid-Amerika nou Asië sal verbysteek as die mees gewilde langafstandbestemming.
John Lucas, ‘n kenner op die gebied van aanlynbesigheid, sê sosiale netwerke se rol in winskopiejag sal aanstaande jaar nog belangriker word.
“Die Joie De Vivre-hotelgroep tweet elke Dinsdag ‘n eksklusiewe aanbod aan 10 000 Twitter-gebruikers,” verduidelik Lucas.
“In minder as ‘n jaar het hulle 1000 hotelkamers volgemaak; kamers wat andersins leeg sou gebly het.”
Lees meer by Breaking Travel News.