Qantas weer op dreef
2011-10-31 09:00
Canberra, Australië – Australië se lugveiligheidsagentskap het Qantas toestemming gegee om Maandag weer met vlugte te begin nadat die wêreld se 10de grootste lugredery al sy vlugte opgeskort het as gevolg van ‘n arbeidsdispuut.
Peter Gibson, woordvoerder van die Civil Aviation Safety Authority, het bevestig dat die agentskap Qantas toestemming gegee het om weer te begin vlieg.
Qantas sal teen Maandagmiddag weer met vlugte begin. Die maatskappy se uitvoerende hoof, Alan Joyce, het gesê die lugredery sy skedule sal teen Dinsdag weer na normaal terugkeer.
Tienduisende mense van oor die wêreld heen is deur die drie dae se vlugkansellasies geraak en Qantas-passasiers het by lughawens in Australië en Los Angeles saamgedrom in die hoop om uiteindelik by hul bestemmings uit te kom.
‘n Beslissing deur ‘n arbitrasiehof het Sondag weke se stakings tot ‘n einde gebring.
Die hofbeslissing was ‘n reuse-oorwinning in die lugredery se twis met vakbonde wat vlieëniers, werktuigkundiges, bagasiehanteerders en spyseniers verteenwoordig het.
Die stakings deur die werkers het daartoe gelei dat 600 vlugte in onlangse maande gekanselleer is. Sowat 70 000 passasiers is geraak en dit het Qantas Aus$70 miljoen (sowat R580 miljoen) uit die sak gejaag.
Nietemin meen talle kenners in die lugvaartbedryf dat die skielike kansellasie van al 108 vliegtuie Saterdag, teen ‘n koste van $20 miljoen ‘n dag, wêreldwyd groot skade aan die Australiese lugredery se reputasie aangerig het.
– Volg Nuus24 op Twitter
- Sapa - AP