Qantas waarsku oor nóg 'n staking
2011-09-26 10:30
Sydney – Die Qantas-lugredery het Maandag gewaarsku dat sy bedrywighede ontwrig kan word nadat sowat 4 000 personeel hulle tweede staking in twee weke aangekondig het.
Lede van die Vervoerwerknemersunie (TWU) sal Vrydag vir een uur lank staak weens 'n dispuut oor kontrakte.
Daarmee saam sal daar ook ‘n staking van een uur deur vliegtuig-ingenieurs in Melbourne wees.
Ingenieurs in Sydney gaan ook Dinsdag vir ‘n uur lank staak en doeanebeamptes sal glad nie werk nie, wat internasionale passasiers sal ophou.
Olivia Wirth, Qantas se mediahoof, het gesê die aksie is gereël om die maksimum effek te hê. Planne van families wat op vakansie wil gaan en duisende sportaanhangers, insluitend mense van Nieu-Seeland, sal deur dié staking geraak word.
“Dit is een van ons besigste naweke van die jaar met duisende mense wat op Vrydag rondreis in Australië vir rugby en die skoolvakansie,” het Wirth gesê.
“Die unie is bewus daarvan en wil so veel as moontlik ontwrigting vir passasiers veroorsaak.”
– Volg Nuus24 op Twitter.
- Sapa - AFP