Puik strand: Victoriabaai, Tuinroete
2010-12-10 13:45
Enige surfer wat sy sout werd is weet van hierdie netjiese strandjie tussen George en Wildernis. Hier’s amper elke dag goeie branders, maar die golf wat wêreldbekend is, is die ene wat van die regterpunt af breek die dag as die toestande nét reg is.
Die branders is nie net bedoel vir surfers met geroeste Kombi’s en ’n swakheid vir aaptwak nie. Dis ook ’n puik plek om te boogie board. Bring daai plankie!
Waar is dit?
Jy sal die Victoriabaai-bordjie langs die N2 tussen George en Wildernis sien. Die strand is omtrent 3 km verder op ’n goeie teerpad.
Doen dít
Slaap oor. Leef vir ’n ruk soos die hippie-surfers van ouds hier in Victoriabaai se woonwapark teen die heuwel agter die strand. Bly tot jou hare wit gebleik is. Jy sal nooit moeg word vir die uitsig oor die see nie en die seebries sal jou tent koel hou. Wat wil jy nou meer hê?
Kontak: 044 889 0081
As jy nie ’n watermens is nie
Vicbaai is piepklein. Stap al langs die rotse aan die westekant van die baai en kyk hoe die branders inrol. As jy ’n telefotolens het, kan jy ’n goeie foto kry van ’n branderryer in die “groen kamer”, onder die lip van ’n golf.
Kliek hier vir meer oor dié strand.
Besoek Weg vir nóg puik strande en bestemmings.
- Volg Nuus24 op Twitter.