Peru beplan nou hoogste Christusbeeld
2011-06-14 13:55
Peru – Die president van Peru, Alan Garcia, se planne om die wêreld se hoogste Christusbeeld in Lima te bou het plaaslike inwoners warm onder die kraag omdat hulle bekommerd is dit sal die stad se profiel verander.
Garcia, wat aan verslaggewers gesê het dat hy persoonlik $37 000 (sowat R250 000) geskenk het om die projek te finansier, het gesê die 37 meter hoë standbeeld is ‘n “persoonlike droom”.
“Hierdie standbeeld kan Peru seën en Lima beskerm,” het hy oor die projek gesê. Dit word ook deur Brasiliaanse maatskappye befonds.
Susana Villaran, die burgemeester van Lima, het haar ontsteltenis uitgespreek oor die ligging van die beeld op ‘n heuwel wat afkyk oor Lima se baai, wat 20 km langs die westelike deel van die stad strek.
“Ek respekteer president Garcia en ek is ‘n gelowige. Maar daar is so iets soos die integriteit van die landskap van Lima se baai,” het sy gesê en bygevoeg dat die president voor die tyd met plaaslike amptenare moes gesels het oor die planne.
Die standbeeld se voorgestelde ligging op die Morro Solar-heuwel meng ook in met ‘n ander historiese gebied, het die historikus en argeoloog Guillermo Lumbreras gesê.
Die Morro Solar ondergaan al vir jare ‘n reeks projekte as ‘n geskiedkundige park... Die heuwel word gesien as ‘n plek waar daar ‘n geveg was in die oorlog teen Chili en dit moet so bly,” het hy gesê.
Villaren het gesê sy beplan om met Garcia te gesels sodat daar na ander plekke gekyk kan word om die Christusbeeld op te rig.
Die standbeeld, wat op 29 Junie ingehuldig sal word, sal na verwagting die 36 meter Christusbeeld in Swiebodzin, Pole, wat verlede jaar November voltooi is en tans die hoogste beeld van sy soort is, in hoogte verbysteek.
Die mees gewilde Christusbeeld is steeds in Rio de Janeiro.
Volg Nuus24 op Twitter
- AFP