Personeel in die sop ná seun (11) alleen na Rome vlieg

2012-10-09 14:49

Londen – Jong Liam Cocoran het in Julie deur vyf beheerpunte by die Manchester-lughawe beweeg voor hy alleen op 'n vliegtuig na Rome geklim het.

Die kajuitbemanning het eers ná die vliegtuig opgestyg het besef dat die 11-jarige alleen is, en hy is met 'n retoervlug huis toe geneem, het the Telegraph berig.

Die skoolseun het ‘n ander gesin deur die beheerpunte gevolg. Hy is nooit gevra om enige dokumentasie te wys nie.

Bemanningslede van Jet2.com, die lugredery waarmee Cocoran gevlieg het, het ook besluit om nie te tel hoeveel mense aan boord die vliegtuig was nie.

Die lugredery het personeel op die vliegtuig geskors en ‘n ondersoek van stapel gestuur.

Mediabronne het egter Maandag berig dat die geskorste personeellede terug by die werk is.

“Na ‘n deeglike ondersoek gaan ander maatreëls nou in plek gestel word,” het ‘n woordvoerder van Jet2.com gesê.

Intussen is ‘n sekerheidsbeampte by dieselfde lughawe geskors omdat hy nie ‘n vals bom raakgesien het wat as toets deur die departement van vervoer deur die lughawe gesmokkel is nie.

– Volg Nuus24 op Twitter