Oscar-benoemdes kom safari in SA
2010-03-10 10:16
En die wenner is... die 1933 Lion Sands Privaat Wildreservaat in Suid-Afrika!
Dié luukse wildreservaat net langsaan die Kruger Nasionale Park sal binnekort op almal se lippe wees na die 82ste Oscar-toekennings, omdat al Hollywood se gunsteling akteurs, aktrises en regisseurs genooi is om by die lodge te kom vakansie hou.
Die vier benoemdes in die kategorieë vir beste regisseur, beste akteur, beste aktrise, beste ondersteunende akteur en beste ondersteunende aktrise, wat níé in dié afdelings met die louere weggestap het nie, het elk ‘n uitnodiging ter waarde van R370 000 gekry om vir vier aande saam met hul families te kom oornag.
Kliek hier om Lion Sands se galery te sien.
Suid-Afrikaners kan dus heel moontlik uitsien om Morgan Freeman en Matt Damon, wie reeds ons land se naam hoog gehou het met die rolprent Invictus, terug te verwelkom.
Die regisseur James Cameron van Avatar en Quentin Tarantino, wat benoem was as beste regisseur vir Inglourious Basterds, het ook uitnodingings ontvang.
Meryl Streep en Penélope Cruz gaan moontlik ook kom gesig wys.
Verskeie bekendes het reeds die Lion Sands wildreservaat besoek, onder andere was George Michael reeds twee keer hier sowel as Paul-Allen, mede-stigter van Microsoft.
Die Lions Sands privaatwildreservaat is geleë in die wêreldbekende Sabi Sand wildreservaat in Mpumalanga. Dit vorm ook deel van die Kruger Nasionale park, het geen omheinings nie en diere word dus toegelaat om vrylik rond te beweeg.
Vir meer inligting oor die Lion Sands Privaat wildreservaat, kliek hier.
- GoTravel24