Orkaan ruk SAA-vlugte tot stilstand

2012-10-29 07:25

Johannesburg – Die Suid-Afrikaanse Lugdiens (SAA) het sy vlugte na en van New York en Washington gekanselleer weens Orkaan Sandy.

RSG berig passasiers wat geraak word, is versoek om die lugdiens se inbelsentrum of besprekingskantoor te kontak vir bystand.

Intussen het die stad New York Sondagaand al sy trein- en busdienste opgeskort in afwagting op die orkaan.

Die storm sal na verwagting sterk wind en oorstromings aan die oos-kus veroorsaak.

Die radiostasie berig Andrew Cuomo, goewerneur van die staat New York, sê daar word verwag dat die dienste 12 uur ná die storm verby is, hervat sal kan word.

Ander lugdienste het ook honderde vlugte na lughawens aan die Amerikaanse ooskus gekanselleer in afwagting op die storm wat “Frankenstorm” gedoop is.

Air France het ook al sy vlugte na New York en Washington gekanselleer terwyl Amerikaanse lugdienste honderde binnelandse vlugte uitgestel het.

Sapa-AFP het vroeër berig pres. Barack Obama het twee gebeurtenisse vir sy veldtog kanselleer om verwikkelinge wat met Orkaan Sandy verband hou, te monitor.

Die nuusagentskap het bygevoeg dat minstens 29 mense dood is toe die orkaan op die reeds geteisterde Haïti toegesak het.

Volg Nuus24 op Twitter