Onwettige sjimpansees in Turkse hotelle
2011-07-21 13:39
Ankara – Ten minste 12 hotelle in Turkye word daarvan beskuldig dat hulle sjimpansees gevange hou en gebruik om toeriste mee te vermaak, volgens ‘n verslag van die Wêreldvereniging vir die Beskerming van Diere (WSPA).
Die webtuiste Wanderlust het berig dat die WSPA glo klagtes van toeriste ontvang het wat hotelle in die suide van Turkye besoek het, waarvolgens dié hotelle sjimpansees gevange houe en hulle onder meer laat toertjies doen om besoekers te trakteer.
In sommige hotelle word daar ook na bewering vir die diere klere aangetrek en staan mense tou om foto's met hulle te neem.
As die bewerings akkuraat is, breek dié hoteleienaars Turkse wetgewing en moet hulle vervolg word, het die WSPA se verklaring gelui.
“Ons het probeer om die Turkse owerhede te kry om die nodige stappe te neem,” het Victor Watkins, raadgewer vir die WGVD, gesê.
“Die sjimpansees moet gekonfiskeer word, die hoteleienaars vervolg word en regstappe moet teen die hotelle geneem word, ten minste vir die feit dat hulle die diere op hul perseel toelaat.”
Volgens Watkins het hulle nog geen reaksie van die Turkse owerhede ontvang nie en is hy bevrees die onwettige bedryf word eenvoudig geïgnoreer.
– Vol Nuus24 op Twitter.
– Lees die volledige storie hier.