Ontspan, trek uit vir 'n 'naakansie'
2011-08-18 10:27
Kaapstad – Ongeveer ‘n driekwart eeu nadat ‘n koninklike naak swemuitstappie dit in ‘n nudiste-bestemming verander het, mik Kandarola in Kroasië om meer van die wêreld se nudiste vakansiegangers te lok.
“By Kandarola kan nudiste hul eie stukkie paradys vind, met ‘n rustigheid en ‘n bietjie ruimte net vir hulself, sonder om gehinder te word,” het Nedjeljko Mikelic, hoof van die toeristeraad op die noordelike eiland Rab, aan AFP gesê.
Die Kandarola-rots-en-klipstrand op die Kroatiese eiland van Rab is waar Brittanje se koning Edward VIII en sy toekomstige vrou, die Amerikaanse sosiale vlinder Wallis Simpson, in 1936 naak geswem het.
Nudiste besoek Rab al sedert die begin van die 20ste eeu, maar die koninklike paartjie se bekende swemuitstappie het die eiland amptelik internasionaal gewild gemaak as ‘n nudiste-oord.
Plaaslike toerisme-beamptes voel nou dat hulle meer kan doen om geld te maak uit minder hoë-profiel, maar meer gereelde nudiste vakansiegangers.
Europa se eerste kommersiële nudiste-oord was die Koversada-kamp, wat 50 jaar gelede in die noordwestelike Istria -skiereiland oopgemaak het toe Kroasië nog deel van Joego-Slawië was.
Koversada was oorspronklik ‘n klein eiland met digte bome en versteekte nudiste-strande.
Vandag is dit ‘n nudiste-kompleks en besoekers kan 24/7 is hul Adamsgewaad rond baljaar en aan verskeie aktiwiteite deelneem.
“Naturisme beteken vryheid. Ons is heeltemal ontspanne in hierdie wonderlike, vreedsame plek,” het Katalin Reigl, 63-jarige dokter van Hongarye, wat die eiland al vir drie dekades besoek, gesê.
Die kamp strek oor 120 hektaar en het vyf kilometer se strande.
Meeste mense loop in hul geboortepakkies rond, maar hulle word versoek om klere aan te trek wanneer hulle winkels of restaurante besoek.
– Volg Nuus24 op Twitter
- AFP
