Olifante dood Spaanse toeris in Namibië
2011-08-22 16:09
Kaapstad - ’n Spaanse man se lewe is Donderdag deur twee olifante by die kampeerterrein van die Purros bewaringsgebied in Kaokoland in Namibië geëis.
Die 47-jarige toeris, Gordi Blasi, is deur twee olifante met hul slurpe die lug ingegooi, waarna hy glo sy nek gebreek het.
Die voorval is deur sersant Fixon Uanga van die polisie van Opuwo bevestig. Dit is die tweede keer in een week wat die twee olifantkoeie mense aanval.
Die ander voorval was Dinsdag toe ’n man van die Purros bewaringsgebied deur dieselfde olifante aangeval en ernstig beseer is.
“Die man se beserings was so ernstig van aard dat hy nie in die hospitaal op Opuwo behandel kon word nie, maar per ambulans na die Oshakati hospitaal afgevoer moes word,” het sers. Uanga gesê.
Dit was wyle Blasi en sy vrou se tweede besoek aan Namibië en hulle het sedert die begin van Augustus met ’n gehuurde voertuig deur die land getoer.
– Lees meer by Republikein Online
– Volg Nuus24 op Twitter