OR Tambo is gereed, sê Acsa
2010-07-08 13:51
Kaapstad – OR Tambo-lughawe sal beslis die invloei van vliegtuie na Johannesburg vir die Wêreldbeker-finaal by Soccer City kan akkommodeer, het die lughawensmaatskappy Acsa verseker.
Woensdag het talle mense die semi-finaal tussen Spanje en Duitsland gemis toe die nuutgeboude King Shaka internasionale lughawe nié die hoeveelheid vlugte wat daar moes land, kon hanteer nie.
Lugverkeer na Johannesburg sal Sondag na verwagte meer wees as wat Durban Woensdag ondervind het.
Unathi Batyashe-Filis, woordvoerder vir die lughawensmaatskappy, het Nuus24 verseker dat die situasie op King Shaka internasionale lughawe homself nié sal herhaal nie.
Sy het bygevoeg dat OR Tambo-lughawe groter is as Durban se lughawe, wat opsigself ‘n soortgelyke fiasko sal verhoed.
“Ons kan 180 vliegtuie by OR Tambo akkommodeer,” het Batyashe-Fillis gesê.
“Daar word ook spesiale reëlings getref vir vliegtuie wat langer as die gewone staantyd wil bly,” het sy bygevoeg.
Volg Nuus24 op Twitter.