Nuwe valskermrekord opgestel
2009-09-24 14:58
Katmandu, Nepal – ‘n Groep valskermspringers het Woensdag die wêreldrekord vir die hoogste valskermlanding opgestel, toe hulle naby die Everest-bergreeks gespring het.
Drie professionele valskermspringers het van ‘n hoogte van 6060 meter gespring en by Gorakshep naby die berg Everest op ‘n hoogte van 5164 meter te lande gekom.
Dit is die wêreld se hoogste landingspunt tot dusver.
Leo Dickinson (62) en Ralph Mitchell (24) van Brittanje het saam met Ramesh Chandra Tripathi (45) van Indië die rekord opgestel.
"Ek het vir vier sekondes vry geval en drie minute later het ek geland,” het Dickinson gesê.
Die springers kan vir maksimum vyf sekondes vry val voor hulle hul valskerms moet oopmaak om te land.
Nepal het verlede jaar valskermspronge naby die 8848 meter hoë piek van Everest begin aanbied.
Die regering sê hulle laat net valskermspronge naby die Everest-bergreeks toe om toerisme te bemark.
Nepal se toerismeindustrie is vir ‘n dekade lank gepootjie weens politieke oproerigheid.
Maar sedert 2006 het die toerismebedryf begin verbeter en dié land het 2011 as sy “toerisme-jaar” aangekondig.
Verlede jaar het meer as ‘n half miljoen mense die land besoek en dit was een van die mees suksesvolle jare in die toerismebedryf vir Nepal.
- Sapa