Nuwe toeriste-belasting in Venesië bekendgestel
2011-07-26 20:53
Besoekers aan Venesië sal van Augustus ‘n ekstra geldjie moet uithaal vir hotel-belasting, terwyl die Italiaanse stad spook om kop bo water te hou met die stygende watervlakke.
Besoekers wat in vyfster hotelle bly sal van 24 Augustus €4,50 (sowat R44,00) by hul rekening moet voeg, terwyl diegene wat in minder luukse akkommodasie tuisgaan volgens ‘n glyskaal belas sal word.
Die idee van ‘n ingangsfooi na die stad word al vir ‘n geruime tyd oorweeg.
Die Venesiese raad hoop dat die belasting miljoene ponde sal inbring vir die dringende instandhouding van die stad, wat stadig maar seker besig is om te sink as gevolg van stygende seevlakke en meer gereelde winterstorms.
“Die fundamentele doel is om by toeriste wat lief is vir Venesië en die stad besoek ‘n bydrae te kry om ‘n stad wat uniek en baie kosbaar is, maar ook baie broos is, te help voortbestaan,” het Sandro Simionato, die adjunk-burgemeester, gesê.
Venesië loop die risiko om deur toeriste oorstroom te word – die stad se inwoners het onlangs tot onder 60 000 gedaal en dit word daagliks deur dieselfde hoeveelheid toeriste binnegestroom.
– Lees meer.
– Volg Nuus24 op Twitter