Nuwe roete moet toeriste na minder bekende dele lok
2011-09-29 14:59
Mbabane – KwaZulu-Natal, Swaziland en Mosambiek wil nuwe asem in ‘n roete blaas wat daarop gemik is om toerisme in die drie onderskeie lande ‘n hupstootjie te gee.
Die East3Route-inisiatief, wat onlangs in Johannesburg bekendgestel is, is ‘n roete wat toeriste ‘n smakie gee van die onderskeie kulture in dié drie gebiede.
Michael Mabuyakhulu, KwaZulu-Natal se LUR vir toerisme, sê die roete sal ‘n groot toerisme-aantreklikheid in die streek word.
“Ons wil ‘n groter hoeveelheid toeriste na hierdie deel van Suider-Afrika lok. Ons wil hierdie inisiatief koördineer om te verseker dat dit toerisme-aktiwiteit verhoog,” het Mabuyakhulu gesê.
Die East3Route sal die fokus op die kus langs die Indiese Oseaan, noord van Durban plaas – ‘n deel van Suid-Afrika wat min besoekers lok.
Dit is ook daarop gemik om besoekers te lok na die oostelike laeveld van Swaziland en die suide van Mosambiek.
Die grootste deel van die roete was vir dekades buite perke as gevolg van Mosambiek se burgeroorlog en die opbou van die land ná die oorlog.
“Dit is ‘n dialoog van kultuur. Die roete is nog altyd daar, maar nou doen ons dit met besigheid in gedagte,” het Swaziland se minister van toerisme en omgewingsake, Macford Sibandza, gesê.
‘n Afvaardiging van amptenare uit die drie lande sal die roete op 24 Oktober uittoets.
Aktiwiteite op die roete sluit onder andere in die proe van tradisionele kosse van Suid-Afrika, Swaziland en Mosambiek.
– BuaNews
– Volg Nuus24 op Twitter