Nou kan toeriste ook spog oor Kaapstad
2010-06-16 02:00
Kaapstad – Besoekers aan Kaapstad en die Wes-Kaap kan nou kommentaar, video’s en foto’s van hul vakansies en ervarings op die internet plaas by www.visitorreview.com/tourismcapetown.
Daar is nege verskillende kategorieë vir artikels / resensies, wat die ses distrikte sowel as aantrekkings en gebeure rondom die Wêreldbeker-sokkertoernooi insluit.
“Hierdie inisiatief kom met die 2010 Fifa Wêreldbeker-sokkertoernooi, die grootste sportgeleentheid in die wêreld, wat tans in Suid-Afrika aangebied word. Besoekers stroom elke hoek van die land binne en ons wil deel in hulle ervaring van ons wonderlike land.
“Nie net sal dit vir ons insig bied in ons gaste nie, maar dit bied ook ‘n platform vir hulle om hul ervarings van Kaapstad en die Wes-Kaap met ‘n gehoor buiten hul familie en vriende te deel,” het Calvyn Gilfellan, uitvoerende hoof van Cape Town Routes Unlimited (CTRU) gesê.
Die hoofdoel van die veldtog is om buitelandse sokkerondersteuners aan te moedig om Kaapstad en die Wes-Kaap se mooi en diverse besienswaardighede tussen wedstryde te geniet.
Volg Nuus24 op Twitter