Nieu-Seeland gaan visums vereis
2012-03-20 07:03
Pretoria – Kommer oor die bedrieglike gebruik van Suid-Afrikaanse paspoorte deur mense wat nié Suid-Afrikaanse burgers is nie kan beteken dat die land se visumvrye status in Nieu-Seeland tot ’n einde kan kom.
Tot op hede kan Suid-Afrikaners, wat soontoe reis om vir vriende en familie te gaan kuier of om te gaan kyk of hulle soontoe wil emigreer, dit doen sonder enige visum. Nou het die Nieu-Seelandse parlement besluit om dié status te heroorweeg.
Nathan Guy, die land se minister van immigrasie, het volgens Phil Rennie, sy mediasekretaris, gesê die land moet alles moontlik doen om immigrasie-risiko’s te beperk.
Volgens Guy is dit nie net die gebruik van Suid-Afrikaanse paspoorte deur vreemdelinge wat sy land bekommerd het nie, maar ook die vrye beskikbaarheid van wettige Suid-Afrikaanse paspoorte, wat bedrieglik gebruik word.
Die Nieu-Seelandse media het die afgelope paar dae bespiegel dat die hersiening waarskynlik net ’n skynvertoning is vir ’n besluit wat klaar geneem is om vervolgens visums te vereis.
Op ’n Nieu-Seelandse immigrasie-blog bespiegel die skrywers egter dat dit geen sin maak waarom ’n Al-Kaïda-terroris met ’n Suid-Afrikaanse paspoort na dié land sal wil reis nie.
Een skrywer meen dit is eerder voorkomende optrede vir ingeval daar in die toekoms dalk ’n vlaag Suid-Afrikaners is wat op kort kennisgewing heenkome in ’n ander land soek. Volgens die skrywer is dit ’n hartseer-refleksie van die “nuwe” Suid-Afrika wanneer ander lande weer van voor af teen Suid-Afrikaners diskrimineer soos in die apartheidsjare.
Die Nieu-Seelandse kwalifikasie-owerheid het in die verlede gevind dat gemiddeld een uit drie van die Suid-Afrikaanse kwalifikasies wat hy ondersoek vir immigrasiedoeleindes, vals is.
Geen nagraadse kwalifikasies wat ná 2010 verwerf is, word meer aanvaar alvorens dié owerheid dit ondersoek het vir egtheid nie.
Terselfdertyd meen ’n skrywer dat Nieu-Seeland in die moeilikheid gaan wees sonder die vaardighede wat veral die Suid-Afrikaners na die land toe bring.
– Volg Nuus24 op Twitter
- Beeld
