New Yorkers kan uiteindelik ondergrond klets
2011-09-28 10:39
VSA – New York se stokou ondergrondse treinstelsel het Dinsdag uiteindelik die selfoonera betree, maar die sein-strepies wat skielik op hul fone verskyn het, het nie alle pendelaars ewe gelukkig gemaak nie.
Dié stad se sowat 4,3 miljoen daaglikse gebruikers van die ondergrondse treinstelsel kan nou, jare ná ander groot wêreldstede en selfs Amerikaanse stede soos Boston en San Francisco reeds die gebruik van selfone ondergrond ingestel het, ook oproepe maak.
Nietemin het nog net ses stasies aan die weste van Manhattan opvangs, met die res van die stelsel – wat ‘n eeu gelede gebou is – wat waarskynlik eers teen 2016 netwerkdekking sal hê.
Tog is dit vir diegene wat nou hul geliefde selfone op die treine kan gebruik groot nuus.
“Dit is natuurlik ‘n goeie ding. Ons het dit nodig,” het die konstruksiewerker Victor Simoni op pad na Manhattan gesê.
“Ons kom al die pad van die Bronx om in Manhattan te kom, dit neem omtrent ‘n uur,” het sy kollega Benny Djoni, gesê.
“Ons het dit nodig om ons werk te reël, dis ‘n besige lewe.”
Sommige New Yorkers het hul verbasing uitgespreek dat die stad nou eers stappe begin neem het om kommunikasie onder straatvlak moontlik te maak.
Vir ander is die vooruitsig van luiende fone en openbare gesprekke oor die weer nie so opwindend nie.
– Volg Nuus24 op Twitter
- AFP