Ministers sweef vir stemme vir Tafelberg
2011-11-08 07:05
Kaapstad – Twee Wes-Kaapse ministers het hulle gister na die lugruim gewend om stemme vir Tafelberg te werf omdat dit nog nie onder die toptien van die Sewe Natuurwonders van die Wêreld-kompetisie is nie.
Daar is nog net drie dae oor om te stem.
Alan Winde, minister van finansies, ekonomiese ontwikkeling en toerisme, en dr. Ivan Meyer, minister van kultuursake en sport, het van ’n winderige Vlaeberg geskermsweef. “Ek is net hier omdat Allan hier is,” het ’n ooglopend gespanne, maar glimlaggende Meyer gesê.
“Nee, nee, ons is albei hier sodat mense vir Tafelberg sal stem,” het Winde hom tereggewys.
Volgens Winde, wat al met ’n valskerm uit ’n vliegtuig gespring en ’n enjin-aangedrewe skermsweefvlug onderneem het, sal dit baie vir Suid-Afrikaanse toerisme beteken indien Tafelberg Vrydagaand as een van die wêreld se sewe natuurwonders gekroon word.
Ramsey Abott, ’n Britse toeris wat Tafelberg en Vlaeberg gisteroggend besoek het, het gesê: “Dit spreek vanself. As enigeen dít nie kan waardeer nie...” het hy kopskuddend met ’n kenmerkend Britse aksent gesê en na die berg geloer.
“Ek gaan beslis stem,” het hy bygevoeg.
Volgens Meyer, wat gister ’n rooi hemp met die woorde “My Cape Town” gedra het, is Tafelberg die tuiste van meer as 2200 plantspesies, insluitend die grootste konsentrasie bedreigde plantspesies in ’n spesifieke gebied.
’n Oorwinning vir Tafelberg sal groter bewustheid vir die bewaring van die Kaapse blommeryk bring.
Hy het gistermiddag, ná sy sprong, gesê: “Ek gaan dit beslis weer doen. Vandag het dit gevoel soos werk – volgende keer gaan ek net ontspan.”
Hy het gesê Kapenaars kan trots wees op hul toeriste-bestemmings en die vaardigheid van plaaslike toergidse, soos die skermsweef-instrukteur saam met wie hy gevlieg het wat die winderige toestande baie behendig hanteer het.
– Stem deur “tafel” na 34874 te SMS. Dit kos R2 per SMS. Of stem by www.new7wonders.com.
– Volg Nuus24 op Twitter.
- Die Burger