Melbourne 'beste plek om te bly'
2011-08-30 14:07
Sydney – Melbourne, Australië se tweede grootste stad, is die beste plek in die wêreld om te bly, het ‘n opname waarin 140 stede gelys is, Dinsdag getoon.
Melbourne, met 'n telling van 97,5%, het Wene (97,4%) net-net geklop in die Economist Intelligence Unit se jongste jaarlikse opname van die stede met die beste en slegste lewenstandaarde.
Vancouver was in die derde plek, met 97,3%.
Sydney, Perth en Adelaide het dit tot in die top-10 gemaak, sowel as Toronto en Calgary in Kanada, Helsinki in Finland en Auckland, Nieu-Seeland se grootste stad.
Jon Copestake, die redakteur van die opname, sê Vancouver het sy eerste plek vir die eerste keer in byna ‘n dekade verloor.
“Australië, met ‘n samelewing wat ‘n lae digtheid het, sowel as relatiewe lae vlakke van misdaad, het steeds van die wêreld se mees leefbare stede,” het Copeland in ‘n verklaring gesê.
“Ten spyte van die stygende lewenskoste, gedryf deur die sterk Australiese dollar, bied hierdie stede ‘n verskeidenheid faktore wat hulle baie aantreklik maak.”
Die stede wat onder op die lys geëindig het was Port Moresby, die hoofstad van Papoea-Nieu-Guinee en Dhaka in Bangladesj.
Harare het heel laaste geëindig.
– Volg Nuus24 op Twitter
- Sapa-DPA
