Mans erken moord op reisagent in Phuket

2012-06-26 15:00

Bangkok – Twee mans wat van die moord op ‘n Australiese reisagent verdink word, het erken dat hulle die vrou op die Thaise eiland Phuket vermoor het.

Huffington Post berig die Thaise mans beweer hulle wou net Michelle Smith se handsak gryp en het nie bedoel om haar dood te maak nie.

Die polisie het die vermeende moordenaar en sy medepligtige, wat glo die motorfiets bestuur het, terug na die misdaadtoneel geneem waar Smith (60) verlede week doodgesteek is.

Sy was ná aandete saam met ‘n kollega op pad na haar hotel toe twee mans op ‘n motorfiets haar handsak probeer gryp het.

Die vrou is gesteek toe sy geweier het om die handsak vir hulle te gee.

“Ek het daardie dag ‘n fout gemaak. Ek het nie gedink nie,” het die motorfietsryer gesê.

“Ek was roekeloos en dinge het buite beheer geraak. Dit was ‘n fout.”

Volg Nuus24 op Twitter