Mango-geskil kan baie se Kersvakansie bederf
2011-12-08 07:00
Kaapstad. – Duisende vakansiegangers kan van Vrydag af gestrand wees as ’n staking deur vlieëniers van die laekostelugdiens Mango voortgaan.
Mango en verteenwoordigers van sy werknemers sal vandag vergader in ’n laaste poging om dit te probeer voorkom. Die partye stry al sedert Augustus oor salarisverhogings vir vlieëniers.
Hulle is aanvanklik 5,6% aangebied, maar sê dit is onaanvaarbaar. Sedertdien is die aanbod tot 6,5% verhoog.
Ilze Nieuwoudt, woordvoerder van die vakbond Solidariteit, wat 53 van die 57 vlieëniers verteenwoordig, sê hulle verdien 40% minder as vlieëniers van Comair en tot 60% minder as vlieëniers van die Suid-Afrikaanse Lugdiens, ondanks die feit dat Mango deur die SAL besit word.
As die staking sou voortgaan, kan duisende vakansiegangers wat reeds kaartjies gekoop het, gestrand wees omdat ander lugdienste se vlugte oor die feestyd grootliks vol bespreek is.
Die SAL sal Mango-passasiers ook nie kan help nie omdat die lugdiens se vlugte vol is vanweë die COP17-beraad in Durban.
Hein Kaiser, Mango-woordvoerder, sê die lugdiens is daartoe verbind om ’n staking te vermy. “Mango het reeds ’n plan om te verseker dat daar minimale ontwrigtings sal wees as ’n staking kom.”
– Volg Nuus24 op Twitter
- Die Burger