Man vermoor, vrou ontvoer by vakansie-oord
2011-09-12 09:32
Kenia - ‘n Britse man is vermoor en sy vrou ontvoer in ‘n aanval deur vermeende Somaliese Islamitiese ekstremiste by ‘n luukse strandoord in die noorde van Kenia, het amptenare Sondag gesê.
Die aanval het Saterdagaand by ‘n toeriste-lodge in die Kiunga-reservaat op die Lamu-skiereiland aan Kenia se noordkus plaasgevind, het die polisie in Kenia gesê.
Polisiebeamptes het ‘n reuse-soektog met motorbote en helikopters geloods om na die ontvoerders te soek en daar word vermoed dat die aanvallers Shebab-ekstremiste van Somalië is.
“Ons het ‘n reuse-soektog geloods, maar ons sukkel want hulle kon dalk weggekom het met ‘n motorboot,” het die amptenaar, wat anoniem wou bly, gesê.
“Ons vermoed die Shebab is betrokke.”
“Twee Britse burgers is by ‘n strandoord noord van Lamu naby die grens tussen Kenia en Somalië aangeval. Een is dood en die ander een is ontvoer,” het ‘n woordvoerder vir Brittanje se departement van buitelandse sake gesê.
‘n Britse regeringsbron het bevestig dat ‘n man vermoor en sy vrou ontvoer is.
Die paartjie, wat Saterdag deur die dag by die oord aangekom het, is glo omstreeks middernag in hul kamer aangeval, het Kenia se polisiehoof, Mathew Iteere, gesê.
Hulle was ten tyde van die voorval die enigste gaste by die oord.
“Daar was slegs een skoot. Sover ons kon aflei het die man hulle probeer teësit. Miskien wou hulle albei ontvoer, maar hy het teen hulle baklei,” het Ireere gesê.
“Ons hanteer dit as 'n aanval deur struikrowers.”
Die kompleks word goed beskerm deur ses polisiemanne en 22 privaat wagte, het hy gesê. Tog het die hutte “geen deure nie – slegs ‘n lap word as deur gebruik – so hulle het maklik toegang verkry.”
Die Keniaanse polisie en Britse beamptes ondersoek die saak.
– Volg Nuus24 op Twitter
- AFP