Man probeer luiperds, beer in tas smokkel
2011-05-13 15:50
Bangkok – Amptenare by ‘n Bangkokse lughawe het ‘n eersteklaspassasier wie se tasse gevul was met jong luiperds, swartluiperds, ‘n beer en ape in hegtenis geneem.
Die diere was bedwelm en was na Doebai onderweg.
Die man is ‘n 36-jarige inwoner van die Verenigde Arabiese Emirate.
Hy is vroeg Vrydagoggend deur die geheime polisie by Bangkok se Suvarnabhumi- internasionale lughawe in hegtenis geneem.
Amptenare het sy tas oopgemaak en op twee luiperds, twee swartluiperds, ‘n Asiatiese swartbeer en twee makaak-ape afgekom.
Thailand is gewild vir die smokkel van diere, maar hierdie was ‘n ongewone vonds. Gewoonlik word daar met skilpaaie, slange en reptiele gesmokkel.
Volg Nuus24 op Twitter
- AP