Man agtergelaat in see ná snorkel-uitstappie
2011-06-29 16:57
Kaapstad – ‘n Amerikaanse toeris het vertel hoe hy vreesbevange was nadat hy besef het sy toerboot het hom agtergelaat tydens ‘n snorkel-uitstappie naby Australië se Groot Koraalrif.
Ian Cole (28) moes na ‘n ander boot swem nadat hy Saterdag naby Michaelmas Cay, ‘n sandeiland naby Cairns wat deur koraal omring word, agtergelaat is.
Cole het gesê hy het paniekerig geraak toe hy opkom en sien die boot is weg.
“Ek kon myself ‘n bietjie kalmeer, want daar was nog ‘n ander boot op die water en ek het daarheen geswem,” het hy Woensdag aan die Cairns Post-koerant gesê.
“Gelukkig was dit daar, anders sou ek dalk verdrink het. Ek het nie die situasie goed hanteer nie en ek was moeg.”
Duikoperateurs moet voldoen aan streng koptellings ná die 1998-verdwyning van ‘n Amerikaanse paartjie, Tom en Ellen Lonergan, wat vermoedelik deur haaie geëet is nadat hulle deur hul toergroep agtergelaat is.
Die leiers van die duikspan het eers twee dae later opgemerk dat hulle vermis is toe daar van die Londergans se persoonlike besittings op die boot gevind is.
Die paartjie is nooit opgespoor nie.
Colin McKenzie, woordvoerder van die toerisme-operateur, het gesê Cole was langs ‘n strand gelos en dat hy “nooit in enige gevaar” was nie.
Die persoon wat verantwoordelik was vir die verkeerde koptelling is afgedank en Cole het sy geld teruggekry.
“Daar is ook ‘n verskoningsbrief aan hom gegee,” het McKenzie gesê.
“Hy het ‘n koopbewys ook ontvang wat hy by enige van ons restaurante kan gebruik,” het hy aan ABC-radio gesê.
Volg Nuus24 op Twitter
- AFP