Lughawe dwing bejaarde om doek af te haal
2011-06-27 17:01
Washington – ‘n Bejaarde vrou (95) wat van Florida na Michigan gevlieg het om die laaste tydjie van haar lewe daar deur te bring, is deur sekuriteitsbeamptes gedwing om haar doek te verwyder, het haar familielede gesê.
Die vrou is op 18 Junie in ‘n rolstoel deur haar dogter na die lughawe in die noordweste van Florida gebring waar sy na Hastings, Michigan, sou vlieg.
Beamptes van die departement van sekuriteit het die vrou alleen na ‘n kamer geneem, het haar dogter Jean Weber aan CNN gesê.
Sekuriteitsagente het later uitgekom met die bejaarde en aan Weber gesê sy moet haar na die toilet neem om haar doek af te haal.
Volgens Weber het sy aan die agente probeer verduidelik dat haar ma baie siek is en aan leukemie ly.
“Ek het aan hulle verduidelik dat sy teruggaan na Michigan om dood te gaan,” het Weber gesê.
“Al waaraan ek op daardie stadium kon dink is hoekom doen hulle dit aan ‘n 95-jarige vrou in ‘n rolstoel? Sy is siek en al wat sy wou doen, is om huis toe te gaan,” het Weber Sondag aan die Detroit News gesê.
Weber het vertel dat sy so ontsteld was toe sy teruggekeer het van die badkamer dat sy begin huil het.
“Ek het gehuil. Hulle het gevoel ek is ‘n sekuriteitsrisiko,” het sy gesê.
Haar ma het dit betyds tot op die vliegtuig gemaak, maar Weber het die vlug gemis terwyl beamptes alles in haar handsak en aan haar lyf ondersoek het.
Sy het gesê sy weet nie of sy haar ma ooit weer lewendig sal sien nie. Sy het gevolglik ‘n klag ingedien by die TSA, ‘n regeringsafdeling in die VSA verantwoordelik vir vervoersekuriteit.
Die agentskap het Sondag by sy agente gestaan en voer aan dat hulle “professioneel en volgens die regte prosedures opgetree het”.
– Volg Nuus24 op Twitter
- SAPA