Kom uit jou gemaksone en reis plaaslik
2011-02-01 14:48
Kaapstad – Die plaaslike toerisme-mark moet groei om meer werk in die sektor te skep, het Tommy Edmond, voorsitter van die Toerisme-besigheidsraad van Suid-Afrika, gesê.
“In my opinie moet ons mense leer om op vakansie te gaan, dit is die neiging in alle lande waar daar ‘n sterk plaaslike toerismemark is,” het hy by die bekendstelling van die eerste Toerisme Besigheidsindeks in Johannesburg gesê.
“Mens moet hulle leer hoe om te reis. Dit is nuut, dit neem hulle uit hul gemaksone.”
Edmond het bygevoeg dat die ANC se plan om 225 000 werke in die volgende 10 jaar in die sektor te skep moontlik is, indien plaaslike toerisme toeneem.
Volgens die indeks was die grootste beperking vir die industrie in die laaste kwartaal die tekort aan aanvraag van oorsese besoekers en die sterk rand.
Beide faktore kan verlig word deur die vraag na plaaslike toerisme te bevorder.
Die indeks, wat die eerste van sy soort in die sektor is, het gewys dat indiensneming in die akkommodasie-sektor grotendeels dieselfde in die laaste kwartaal gebly het.
Dit het verder ook daarop gedui dat die industrie verwag het dat die swak vraag van oorsese besoekers ‘n negatiewe impak op toerisme-besighede kan hê.
Volg Nuus24 op Twitter
- SAPA