Kleurvolle plek in Goudstad-hart
2011-09-30 10:18
Hoor jy al lank van die oplewing van die Johannesburgse middestad, maar is jy lugtig om die Goudstad se hart te verken?
Maak jou eerste bestemming dan, sommer dié Saterdag al, 70 Juta – ’n versameling boetiekwinkels en kantore in die hart van Braamfontein se nuwe kultuurdistrik wat deur ’n piepklein binnehoffie verbind word.
70 Juta sorg vir ’n aanloklike spatsel kleur op die sypaadjie.
Val eerste by Post. breakfast. lunch in vir ontbyt of middagete.
Dié onopgesmukte eetplekkie lok allerlei kreatiewes en kunstiges na wie jy van agter jou boek kan loer terwyl jy teug aan een van hul heerlike cappuccino’s.
Post is volgens www.eatorganic.co.za die ideale naam vir dié eetplek in dié stad vol stories omdat dit kan verwys na ’n briefie, ’n plek of ’n bestemming. Hulle gebruik net die beste plaaslike seisoenale produkte.
Gaan maak volgende ’n draai by die Lomography Embassy Store, die eerste lomografie-kamerawinkel in Suid-Afrika; die Afronova-galery of gaan “oe” en “aa” in die klerewinkel Twenty Two, waar jy nuwerwetse ontwerpe van Suid-Afrikaanse ontwerpers kan aanskaf.
Veilige parkeerplek is beskikbaar én jy kan op Saterdae sommer inloer by die nuwe Neighbourgoods Market by Jutastraat 73.
– Besoek http://70juta.tumblr.com/ vir ’n lys van al die winkels in 70 Juta en om uit te vind wanneer musikante daar gaan optree of wanneer ’n interessante uitstalling plaasvind.
– Volg Nuus24 op Twitter.
- Beeld