Kirstenbosch onder die 10 beste piekniekplekke
2011-10-03 10:14
Kaapstad – Die Kirstenbosch- Botaniese Tuin is pas deur National Geographic Traveller as een van die beste piekniekplekke ter wêreld aangewys.
Volgens Sarah Struys, koördineerder van tentoonstellings by Kirstenbosch, is hulle nie in kennis gestel van dié eer nie.
“Ons is verras deur die aankondiging,” het sy gesê.
Volgens Struys het hulle die lys van die tien beste piekniekplekke op Twitter gesien.
Sy het gesê Kirstenbosch bly ’n gunsteling-bestemming danksy die verskillende aktiwiteite waaraan besoekers kan deelneem.
Die botaniese tuin spog met meer as 7 000 plantspesies en die groot, groen grasperke lok al 20 jaar lank besoekers.
“Dit het alles met ons buitelugkonserte begin. Ons hou reeds meer as 20 jaar dié konserte waar mense kom piekniek hou. Besoekers kom deesdae Kirstenbosch toe net om piekniek te hou.”
Die ander nege piekniekplekke op die lys is Huayna Picchu (Peru); Point Reyes National Seashore (Kalifornië); Villa Borghese-tuin (Rome); Jardin des Tuileries (Parys); Haleaka- Nasionale Park (Hawaii); Aran-eiland (Ierland); National Sculpture Garden (Washington, DC) en Singapoer se botaniese tuin.
Volg Nuus24 op Twitter.
- Volksblad