Kannibalisme nié rede vir Duitse toeris se dood
2011-10-19 14:53
Papeete, Frans-Polinesië – Die hoof-aanklaer in Frans-Polinesië het berigte ontken dat ‘n kannibaal ‘n Duitse toeris, wat glo tydens ‘n besoek aan die eiland vermoor is, geëet het.
Aanklaer Jose Thorel het gesê die polisie is op soek na Henri Arihano Haiti, ‘n plaaslike gids wat daarvan verdink word dat hy die 40-jarige Duitser, Stefan Ramin, vermoor het.
Nietemin is daar geen bewyse om die bewering dat Ramin geëet is te ondersteun nie.
Mediaberigte het gesê dat Ramin, wat op 9 Oktober vermis geraak het op die eiland Nuku Hiva en wie se verbrande oorblyfsels verlede week gevind is, doodgemaak, opgesny en geëet is.
Hy was saam met sy meisie op ‘n seiljagvakansie om die wêreld.
“Die teorie van kannibalisme maak geensins deel uit van ons ondersoek nie,” het Thorel gesê.
Ramin het glo vermis geraak nadat hy anker gegooi het naby die eiland en saam met Haiti, ‘n 31-jarige gids, na die binneland gegaan het.
Hy het sy meisie, Heike Dorsch (37), agtergelaat.
Haiti het glo teruggekeer na die boot en beweer dat Ramin beseer is en hulp benodig.
Toe Dorsch die boot verlaat het, het Haiti glo probeer om haar seksueel aan te rand en hy het haar aan ‘n boom vasgemaak.
Menslike oorblyfsels is verlede Woensdag in ‘n verbrande gat op die eiland gevind en volgens Thorel is tande op die toneel gevind en DNS-toetse word gedoen om die fonds te bevestig, het hy gesê.
Polisie het ‘n reuse-soektog geloods vir Haiti, wat voorheen al ses maande in die tronk deurgebring het vir ‘n inbraak in 2005.
Berigte van kannibalisme in Polinesië het mense se verbeeldings aangegryp toe die streek oorspronklik deur Westerlinge verken is, maar kenners sê die praktyk word al vir meer as 100 jaar in onbruik.
– Volg Nuus24 op Twitter
- AFP
