Kan vlieëniers nog vlieg?
2011-08-31 10:46
Washington – Weet vlieëniers nog hoe om te vlieg?
Met vliegtuie wat toenemend staatmaak op outomatisering word vlieëniers se vermoë om in noodgevalle vinnig te reageer al meer bevraagteken, en veiligheidsbeamptes begin regtens wonder of meer dodelike ongelukke nie 'n gevolg van dié tendens kan wees nie.
Honderde mense is in die afgelope vyf jaar in vliegongelukke dood in gevalle waar beheer oor 'n vliegtuig verloor is wanneer die enjin tydens ‘n vlug stol of as die vliegtuig in ‘n ongewone posisie beland wat die vlieënier nie vinnig genoeg kan regstel nie.
In sommige gevalle het vlieëniers bloot die verkeerde besluite gemaak – met katastrofiese resultate.
Die lugvaartbedryf ly op die oomblik aan 'n “verslawing aan outomatisasie”, meen Rory Kay, ‘n lugmag-kaptein en mede-voorsitter van ‘n lugvaart-komitee wat vlieëniers oplei.
“Ons sien ‘n nuwe soort ongeluk met hierdie nuwe en moderne vliegtuie.”
Vlieëniers vlieg byna net drie minute van die vlug self sonder die outomatiese stelsels – tydens die opstyging en die landing.
Die meeste van die tyd programmeer vlieëniers aanwysings op rekenaars, eerder as om self hul hande op die kontrole te hê om die vliegtuig te vlieg.
Hulle het min geleenthede om hul vaardighede op te bou deur self te vlieg, het Kay se adviserende komitee gewaarsku.
Die Associated Press het vlieëniers, amptenare in die bedryf en veiligheidskenners in lugvaart ondervra en almal het kommer uitgespreek oor die implikasies van die min geleenthede wat vlieëniers het om self te vlieg.
Lugrederye en reguleerders raai vlieëniers af, en soms word hulle verbied, om die outomatiese vliegfunksie af te skakel en self te vlieg, het die komitee gesê.
Veiligheidskenners sê hulle sien heelwat gevalle waar vlieëniers wat skielik in ‘n situasie beland waar die outomatiese vliegfunksie foutief raak, nie weet hoe om vinnig te reageer nie of foute maak.
– Volg Nuus24 op Twitter
- AP