Kaapstadse lughawe is die beste in Afrika
2011-03-04 07:03
Theuns van der Westhuizen
Kaapstad - Die Kaapstadse Internasionale Lughawe (KIL) is die beste lughawe in Afrika.
Dit is ook die lughawe in Afrika waar dienste die beste verbeter het.
En die George-lughawe is die beste streekslughawe in Afrika en in die wêreld – én dit is amptelik.
Die Internasionale Raad vir Lughawens (ACI) het dié aankondiging gister gemaak ná die jaarlikse beoordeling van die diens wat die lugvaartbedryf wêreldwyd aan sy kliënte lewer.
Die organisasie Airport Service Quality (ASQ), wat die beoordeling elke jaar aan die hand van passasiers se ervaring op lughawens doen, sal die pryse vir uitnemende diens in April in Indië aan die wenners toeken.
Die beste lughawe in die wêreld is die internasionale lughawe in Seoel, Suid-Korea.
In Afrika word die KIL gevolg deur die Kaïro Internasionale Lughawe in die tweede plek, met O.R. Tambo in Johannesburg derde en King Shaka by Durban vierde.
Op streekvlak – vir lughawens met minder as twee miljoen passasiers per jaar – is George nie net die beste in Afrika nie, maar ook wêreldwyd.
Ná hom kom die Humberside-lughawe in Brittanje, Bridgetown-lughawe in Barbados en Quebec-lughawe in Kanada.
Die Lughawensmaatskappy van Suid-Afrika (Acsa) kon gister kwalik sy trots oor die Suid-Afrikaanse prestasies bedwing.
Deidre Hendricks, Acsa-woordvoerder van KIL, het gesê: “Ons het net minder as ’n jaar gelede ook Skytax se internasionale toekenning vir die beste lughawe in Afrika verower, asook sy toekenning vir die beste lughawe op grond van uitnemende personeeldiens.
“Dit wys dat ons inderdaad onder die bestes in die wêreld is.”
Die ASQ is ’n onafhanklike organisasie wat internasionale maatstawwe vir diens in die lugvaartbedryf stel.
Hy het sy opname vir die beoordeling van lughawens vanjaar onder passasiers op meer as 190 lughawens in meer as 50 lande gedoen.
Die KIL, wat tans 35ste onder die wêreld se 150 beste lughawens is, is veral hoog aangeslaan vir sy parkeergeriewe, waarde vir geld, beskikbaarheid van trollies en netheid in sy badkamers.
Volgens die ASQ is van die vernaamste verbeterings op die lughawe die gemak waarmee jy jou weg daar kan vind.
“Die inwoners van Kaapstad hou ons op ons tone met voortdurende advies om ons diens te verbeter. Die toekennings behoort ook aan hulle,” het Hendricks bygevoeg.
Volg Nuus24 op Twitter
- Die Burger