Kaapstad se Eierman wil Guinness-rekord losslaan
2011-03-07 12:13
Kaapstad se gewilde Eierman, Gregory da Silva, sal binnekort na Italië vlieg in ‘n poging om die Guinness-wêreldrekord op te stel vir die grootste eier-hoed.
Da Silva is ‘n komediant, kunstenaar, storieverteller, danser en straatkunstenaar van Benin, Wes-Afrika, wat Suid-Afrika die afgelope paar jaar sy tuiste gemaak het.
Hy tree daagliks by die Groentemarkplein in Kaapstad op en verskyn by talle feeste deur die jaar, insluitende die Grahamstad Nasionale Kunstefees en die Klein Karoo Nasionale Kunstefees (KKNK) in Oudtshoorn.
Sy besonderse eier-hoed bestaan uit duisende eierdoppe en Afrika-simbole en weeg sowat 25 kg.
Nietemin, vir sy poging om ‘n nuwe rekord op te stel, sal Da Silva se hoed uit 10 000 vars eiers bestaan.
Hy het met die tyd ‘n instelling in die stad geword en word deur plaaslike inwoners en besoekers van onder meer Duitsland, Engeland, Amerika, Italië, Frankryk en België geken aan sy vrolike stem en vriendelike persoonlikheid.
Da Silva sal op 11 Maart na Italië vlieg.
“Ek is so trots en so gelukkig. Kaapstad is soos die hemel vir my. Ek sal wil hê my daaglikse optrede moet soos gewoonlik groot waarde aan Kaapstad voeg – en hierdie keer moet dit help om Kaapstad op die kaart te plaas deur ‘n Guinness-wêreldrekord,” het hy gesê.
“Ek hoop om die Guinness-wêreldrekord terug te bring na Kaapstad.”
Op ‘n vraag oor wat hom die beste ambassadeur vir Kaapstad maak en hoekom hy van staatoptredes hou, het hy geglimlag en gesê: “Ek is ‘n ikoon van Kaapstad. Ek is in almal se albums as hulle foto’s van Kaapstad neem en vir hulle vriende en families by die huis wys.
“Ek is altyd gereed om mense in Kaapstad te verwelkom, of dit reën en of die son skyn, ek glimlag en sê ‘Hallo, dit is Kaapstad, en ons is lief vir jou!’”
Die hoof van Kaapstad Toerisme, Mariette de Toit-Helmbold, het ook haar ondersteuning vir Da Silva uitgespreek en gesê hulle hou duim van vir hom.
- Nuus24