Kaapstad bekroon as beste bestemming in Afrika
2011-09-21 19:37
Kaapstad – Kaapstad is Maandag by die Wêreld Toerisme Toekennings bekroon as die beste bestemming in Afrika.
Dit is die sewende keer wat die stad met hierdie titel wegstap.
Die plaaslike kompetisie was sterk, met die Moederstad wat met Johannesburg, Durban en die Kruger Nasionale Park moes meeding.
Internasionale mededingers was Luxor in Egipte, Marrakesj in Marokko en die Victoria-waterval in Zimbabwe.
“Toekennings is belangrik vir bewusmaking en die profiel van bestemmings, maar dit moet opgevolg word deur veldtogte wat bewusmaking verander en regte besoekers na die bestemming lok,” het Mariette du Toit-Helmbold, uitvoerende hoof van Kaapstad Toerisme, gesê.
Kaapstad is ook vroeër die jaar aangewys as die beste bestemming vir 2011 en het onlangs die sesde plek behaal in Travel & Leisure se Wêreld se Beste Stede-peiling.
– Nuus24
– Volg Nuus24 op Twitter