Kaaltoeriste, hier hoef jy nie 'n tassie te pak nie
2011-06-07 17:57
Ons is almal naak in die wêreld ingebring en vir sommige mense is daar niks lekkerder as om in hul mees natuurlike vorm die natuur in te vaar nie.
Hier is ‘n paar plekke waar selfs jou swembroek te veel bedek.
Onsen, Japan
Dit is ‘n eeue oue Japannese tradisie om in onsen (natuurlike, mineraal-ryke warmwaterbronne) te ontspan en is glo deel van ‘n tradisie wat gesondheid verseker.
Om aan die onsen-etiket te voldoen, moet die persoon homself eers deeglik was voordat die manlike of vroulike bad-areas binnegegaan word.
Bedek jou privaat-dele terwyl jy rondloop en sodra jy in die water is, mag jy nie golwe maak nie.
Sommige Onsen-water is selfs geskik om van te drink.
300 Klub, Antarktika
Om 'n lid van hierdie klub te word, sal die dapper persoon ‘n temperatuurverandering van 149°C moet deurmaak.
Moeder natuur sorg vir die koue, met temperature wat tot -73°C daal in die winter.
Nudiste stoot die sauna gevolglik op tot by 93°C en hardloop dan, al skreeuende en stomende, van die Amundsen-Scott Suidpool-stasie na die geografiese pool (wat met ‘n paal gemerk is) en terug.
Die moeilike deel is om nie te vinnig te hardloop nie, aangesien die yskoue temperatuur buite die longe kan beskadig.
Tiergarten, Duitsland
‘n Gedeelte van hierdie park, wat reg in die middel van Berlyn geleë is, is spesiaal vir nudiste wat ‘n bietjie son wil vang.
Die park was lank gelede ‘n jag-reservaat vir koninklikes, maar hierdie deel is nou meer van ‘n jag-veld vir die meestal manlike sonsoekers.
Dit kan ‘n redelik bevrydende gevoel wees om in jou geboortepakkie in die middel van die stad te ontspan, maar hou dit liefs vir die somermaande.
Kliek hier om meer by Lonely Planet te lees.