Jhb derde gewildste Afrika-stad
2011-07-13 14:12
Johannesburg – Johannesburg is die stad in Afrika en die Midde-Ooste wat die derde meeste besoek word en word die meeste besoek in Sub-Sahara Afrika, volgens die nuutste statistiek van MasterCard.
MasterCard se indeks van wêreldwye toeristebestemmingstede plaas stede in ‘n rangorde volgens hul algehele internasionale besoekers en dié besoekers se oorgrens-besteding.
“Die resultate van die indeks toon dat talle opkomende markstede in die Midde-Ooste en Afrika se besoeker-aankomste en oorgrens-besteding sterk groei,” het Anna Jones, areahoof van MasterCard Worldwide in Suider-Afrika, in ‘n verklaring gesê.
Die stede in die omgewing wat gepeil is, sluit in Doebai, Kaïro, Johannesburg, Tel Aviv, Casablanca, Aboe Dhabi, Nairobi, Riyadh, Amman, Beirut en Tunis.
Volgens die indeks het Johannesburg drie miljioen besoekers in 2011 gehad.
Doebai en Kaïro is die top twee stede op die indeks, met 7.9 miljoen en 3.7 miljoen besoekers onderskeidelik. Tunis en Beirut is in die laaste plekke met 1.7 miljoen besoekers elk.
Die meerderheid besoekers aan Johannesburg kom van Londen, Frankfurt, Doebai, Parys en Gabarone, het Jones gesê.
Sy posisie in die top vyf ten spyt, het Johannesburg egter slegs ‘n 9.9 persent groei in besoekers vir 2011 in vergelyking met 2010 getoon en is dié stad tweede-laaste in terme van groei.
Dié swak syfer kan waarskynlik toegeskryf word aan die ongewoon baie besoekers wat Suid-Afrika tydens die Fifa sokkerwêreldbeker ontvang het, het sy gesê.
– Volg Nuus24 op Twitter.
- SAPA