'Japan is veilig' - sakeman
2011-05-20 12:51
Tokio – Japannese sakeleiers het Donderdag ‘n veldtog geloods om toeriste terug te lok na Japan ná die verwoestende aardbewing, tsoenami en kernramp wat buitelanders uit die land laat vlug het.
“Ek wil graag sê: Japan is veilig,” het Atsutoshi Nishida, die voorsitter van Toshiba, by ‘n vergadering van reis- en toerisme-bestuurders en –amptenare van oor die wêreld gesê.
Internasionale reisbesoeke na en van Japan het sterk gedaal ná die 9.0-aarbewing van 11 Maart naby Sendai en die gevolglike tsoenami wat deur kernkragstasies langs die kus gestroom het.
Sowat 15 000 mense is in die ramp dood.
Terwyl toerisme slegs ‘n klein gedeelte van die ekonomie wat geraak is verteenwoordig, is dit ‘n belangrike faktor vir Japan.
Direk ná die aardbewing het die hoeveelheid toeriste wat in die land gearriveer het met meer as 50% gedaal, het die Japannese toerisme-agentskap gesê.
Daar was tentatiewe tekens van herstel in Mei en Japannese amptenare het gesê dat reis tydens die Goue-week-vakansie in laat-April en begin-Mei beter gevaar het as wat verwag was.
Nietemin het Oxford Economics in ‘n studie wat Donderdag bekendgestel is gesê dat die ervaring ná ander reuse-rampe daarop dui dat dit tot twee jaar kan neem vir ‘n land om terug na normaal te keer.
Volg Nuus24 op Twitter
- Sapa - AFP