In jou 4x4 kan jy wye, woeste wêreld aanpak

2010-03-09 09:51

Janice Keogh

Agter die stuur van jou 4x4 kan jy op plekke uitkom waar ’n gewone voertuig nooit sal kan nie.

Maar, sê Neil Harrison, die redakteur en uitgewer van SA4x4, daar is ’n paar dinge wat moet gebeur voor jy agter die stuurwiel inskuif.

Papierwerk

Dit is belangrik om eers ’n Teta-akkreditasie te kry. Dié akkreditasie behels dat jy by die vaardigheidsontwikkelingsowerheid vir vervoer (Teta) opleiding ontvang in tegnieke wat jou in staat stel om ’n vierwielaangedrewe voertuig op en van die pad af te beheer.

Na afloop van die opleiding sal jy ’n 4x4-en-veldry-bestuursertifikaat of ’n gespesialiseerde 4x4-en-veldry-bestuur-
sertifikaat ontvang. Met dié sertifikaat in jou hand kan jou 4x4-ervaringe begin.

“Ons begin na ’n punt toe beweeg waar sekere veldrybane net deur mense met Teta-akkreditasie gery mag word,” sê Harrison.

Huiswerk

Jy het die papier, nou is dit tyd vir huiswerk. Harrison sê jy moet soveel moontlik inligting inwin oor die roete wat jy gaan aandurf.

Maak byvoorbeeld seker jy het die regte voertuig met die regte ratte en dat jy genoeg ervaring het vir die moeilikheidsgraad van die roete. Harrison se raad is om ook altyd ’n plan B gereed te hê vir ingeval iets skeefloop.

Die wiele

As jy van plan is om op ingewikkelde roetes en byvoorbeeld sanderige oppervlakke met jou 4x4 te ry, het jy ’n voertuig met laetrek nodig.

Dit het ’n ekstra stel ratte wat jou in staat sal stel om teen ’n baie lae spoed te draai en teen steil bulte uit te ry.

Die ander opsie is ’n sagte viertrekvoertuig . Met dié motor sal jy nie ultra-uitdagings kan pak nie, maar dit sal goed genoeg wees om op gruispaaie te ry. Dit is ook meer kostedoeltreffend as jy eintlik meestal in die stad gaan ry.

Watter pad?

Om die regte roete te kies, sê Harrison, moet jy na die gradering kyk. Vyf is die moeilikste en ’n gradering van een is vir onervare bestuurders.

Die roetebestuurder sal gewoonlik aanbevelings maak oor die roete wat vir jou geskik is na gelang van jou voertuig en ervaring.

“Baie mans dink hulle weet van beter as dit kom by die roetes wat hulle aanpak.

“Vroue is oor die algemeen baie beter bestuurders op veldrybane omdat hulle geneig is om na instruksies en raad te luister,” sê Harrison.

Bagasie

Wanneer jy op ’n viertrek-ekspedisie vertrek, pak die volgende in: ’n tou waarmee ’n ander voertuig jou kan trek as jou 4x4 iewers sou vassit, ’n graaf, ’n kaart van die roete wat jy gaan ry, noodnommers, ’n noodhulpkas, gereedskap om ’n pap wiel te herstel, ’n pomp om jou wiele op te blaas en sonskerm.

Jy moet ook nooit alleen gaan ry met jou viertrek-voertuig nie. Maak altyd seker dat minstens twee voertuie saam ’n roete aandurf.

Besoek www.aficanoffroad.co.za vir inligting oor Teta-akkreditasie.

Ondervinding kan jou roete bepaal

Agter die stuur van jou viertrek-voertuig is die wêreld jou oester.
 
Jy kan jou by ’n 4x4-klub in jou omgewing aansluit en saam met ander avontuurlustiges Suid-Afrika se beste roetes aanpak.

Volgens Neil Harrison, die redakteur en uitgewer van SA4x4, hang jou ondervinding af van die keuse van ’n roete.

Volgens hom is die Moegatlé-roete naby Brits ’n lekker roete vir diegene met ervaring. Die tweedagroete by die Karoo- Nasionale Park buite Beaufort-Wes, die roete by Rust de Winter naby Pretoria en die Groot Toren naby McGregor is nog van sy gunsteling-roetes.

Enkele van die gewildste roetes is:

Gauteng: Berakah-4x4-eko-roete en die Hennops.

Noordwes: Moegatlé-roete en die roetes by Rhebok Retreat en Thaba Phuti Safari Lodge.

Mpumalanga: Mac Mac-roete, Riverwild 4x4 en roetes in en om die Krugerwildtuin.

Limpopo: Mabote River Camp-, Grootwater- naby Lephalale en Mabothe-roete.

KwaZulu-Natal: Drakensberge. Dink Sani-pas ...

Oos-Kaap: Lammergeier-reservaat.
 
Nog inligting by www.sa4x4.co.za. 

- Beeld