Heathrow maak reg vir rekordgetal besoekers

2012-07-16 14:44

Londen – Europa se grootste lughawe maak reg om ‘n rekordgetal passasiers te verwelkom soos atlete begin instroom vir die Olimpiese Spele in Londen.

Heathrow sê atlete van meer as 50 lande sal Maandag aankom in dié land, in wat beskryf word as Brittanje se grootste vervoeruitdaging ooit in 'n vredestydperk. Ongeveer 236 955 passasiers sal na verwagting deur die lughawe se terminale beweeg. Die vorige rekord van 233 562 is in Julie 2011 opgestel.

Heathrow het ongeveer 1 000 vrywilligers gekry om die atlete, media en amptenare te verwelkom.

Daar is ook ‘n verhoogde polisie-teenwoordigheid by die lughawe, insluitend snuffelhonde, wat saam met die vrywilligers en die Heathrow-personeel die veiligheid van die besoekers verseker.

Vervoer na Sentraal-Londen is ook verlig deur ‘n “spelelaan” op die M-4 hoofweg oop te maak wat spesiaal vir Olimpiese amptenare en atlete gereserveer is.

Die Olimpiese Spele in Londen begin 27 Julie en eindig 12 Augustus.
 
– Volg Nuus24 op Twitter

- Sapa - AP