Half-kaal toeriste moet toemaak, sê Indië
2010-03-12 12:21
Goa, Indië - Toerisme-amptenare van die Indiese staat Goa het handboeke aan oorsese besoekers begin uitdeel waarin daar gevra word om verkieslik nie naak in die son te lê nie en om ook nie in skrapse kleredrag in die publiek te verskyn nie.
Die versoek kom nadat ’n wetmaker in Goa teenoor Russiese toeriste uitgevaar het. Volgens dié wetmaker “besoedel hulle die denke van die plaaslike inwoners” en kweek hulle ’n “wanindruk by skoolkinders” deur om half-kaal in die strate en op strande rond te loop.
Die voormalige Portugese kolonie is ’n groot oorsese toeristebestemming, wat besoekers lok met hul lang wit strande, naglewe en ontspanne leefstyl.
Die departement van toerisme het ’n beroep op besoekers gedoen om die plaaslike geloof en kulture in ag te neem, alhoewel dié staat die informele Europese styl van kleredrag aanvaar.
“Naaktheid op strande en publieke plekke word nie toegelaat nie,” lees die handboek.
Die riglyne sluit onder andere ook in om “nooit half-kaal op ‘n tweewiel-tuig te ry nie”, om nooit modelkontrakte te onderteken nie en ook nie dwelms te aanvaar nie.
Die handboek is tans in Engels en Russies beskikbaar. ’n Duitse weergawe word beplan.
- Sapa-AFP