Haai-aanvalle sleg vir toerisme in Aus
2011-10-24 11:34
Canberra, Australië – Die skielike dood van ‘n Amerikaanse duiker in die kake van ‘n witdoodshaai op die Weskus van Australië het gelei tot bespiegeling dat ‘n mensvreterhaai vir onlangse sterftes veramtwoordelik is.
Dit is die derde mens wat in drie maande in die omgewing as gevolg van haai-aanvalle gesterf het.
Nietemin is wetenskaplikes van mening dat drie haaie verantwoordelik kan wees en dat die drie gevalle net ongelukkige voorvalle was.
Die suidweste van Australië is meer gewild vir die dolfyn- en walviskyk-bootritte, wit strande, wêreldklas branders vir branderplankry en die peperige shiraz van die Margaret River-distrik as vir dodelike haai-aanvalle.
“Hierdie is ‘n unieke stel omstandighede en ek bid desperaat dat dit nie die begin van ‘n nuwe neiging is nie en dat ons dit nie nou op ‘n gereelde basis sal hê nie,” het Norman Moore, Wes-Astralië se minister van visserye, Sondag na aanleiding van die drie dodelike aanvalle gesê.
Die jongste voorval het Saterdag plaasgevind toe ‘n Amerikaner, George Wainwright (32), aangeval is toe hy van ‘n boot naby Rottnest-eiland, ‘n paar kilometer van Perth, geduik het.
‘n Toeroperateur in die omgewing wat in duik spesialiseer het ‘n beroep op die regering gedoen om haaie dood te maak wat ‘n gevaar vir mense inhou.
“Die moeilikheidmakers – die probleem-haaie wat in ‘n gebied inbeweeg en wat aggressief is – moet doodgemaak word om die risiko van toekomstige aanvalle te verminder,” het Terry Howson, die direkteur van Rockingham Wild Encounters, aan AP gesê.
Howson het die beroep op die regering gedoen sedert een van sy toergidse, Elyse Frankcom, verlede jaar in ‘n haai-aanval beseer is.
“Dit berokken groot skade aan die toerismebedryf,” het hy gesê.
Australië is besig omn slegte naam te kry as ‘n plek wat vol gevaarlike diere is.”
– Volg Nuus24 op Twitter