Green Day-sanger van vlug gehaal
2011-09-05 20:03
Kaapstad – Alhoewel dit nie ongewoon is om te sien hoe ou mense hul oë rol of ma’s met hhul seuns raas as hul broeke te laag sit nie, is dit steeds ‘n bietjie ongewoon om ‘n rockster van ‘n vliegtuig af te skop vir dieselfde rede.
Billie-Joe Armstrong, die hoofsanger van die musiekgroep Green Day, is onlangs van ‘n Southwest Airlines-vlug geskop as gevolg van sy lae, skaatsplank-tipe broek.
Kort nadat hy verlede Donderdag onsuksesvol probeer het om op die vlug van Oakland na Burbank te kom, het hy glo die volgende getweet: “Ek is van ‘n Southwest-vlug geskop omdat my broek te laag gehang het! Wat de f---? Dis nie ‘n grap nie!”
Die voorval het glo kort voordat die vliegtuig sou opstyg plaasgevind.
Die sanger is deur een van die lugwaardinne genader en gevra om sy broek ‘n bietjie hoër op te trek.
Toe Armstrong weier en die lugwaardin vra of sy nie meer dringende sake het om aan aandag te gee nie, is hy en sy reismaat van die vliegtuig gehaal.
Brad Hawkins, ‘n woordvoerder vir Southwest, het in ‘n verklaring gesê Armstrong is op die volgende vlug na Burbank toegelaat. Hy het glo geen verdere klagtes gehad nie.
Die akteur Gerard Depardieu was onlangs ook in die moeilikheid op ‘n vlug.
Hy het glo op ‘n Air France-vlug na Dublin bloot sy ritssluiter afgetrek en sy blaas verlig.
Volgens ‘n vriend van die akteur was ‘n prostaat-probleem te blameer en nie alkohol nie.
– AP, Reuters
– Volg Nuus24 op Twitter
