Gratis busdienste in Kaap vir fietstoer-toeskouers
2011-03-09 14:29
Kaapstad - Die Stad Kaapstad moedig toeskouers by Sondag se Cape Argus Pick n Pay-fietstoer aan om in die middestad te parkeer en gebruik te maak van die gratis MyCiTi-busdienste om hulle by die eindstreep af te laai, eerder as om in Groenpunt te parkeer.
Diegene wat Sondag van MyCiTi se lughawe-dienste gebruik wil maak, sal ‘n effens aangepasde roete hê.
Die diens sal tot 12:00 van die Stadion-stasie in Groenpunt vertrek, in plaas van die Burgersentrum-stasie op Hertzog Boulevard.
Stadion-stasie is op Western Boulevard geleë en kan van Somersetstraat en Fritz Sonnenberg-straat bereik word deur die voetgangerspad by Groenpunt-sentraal.
Die busdiens wat vir die wedren gebruik word sal Sondag tussen die middestad en die eindstreep in Groenpunt loop.
Daar behoort volop parkering in die stad te wees. Groenpunt moet sover moontlik vermy word, aangesien talle paaie gesluit sal wees.
Die MiCiTi-busse sal tussen 08:00 en 12:00 van die onderpunt van Langstraat, oorkant die Kaapstadse Internasionale Konferensiesentrum (Kiks) vertrek.
Tussen 12:00 en 18:00 sal hulle van die Burgersentrum busstasie op Hertzog Boulevard vertrek. Busse sal gemiddeld elke 10 minute vertrek.
Hulle sal na die Stadion-stasie in Groenpunt gaan, wat vyf minute se stap van die eindstreep is. Toeskouers kan dieselfde bus terugneem na die middestad.
Kontak 0800 65 64 63 vir meer inligting, of besoek www.capetown.gov.za/myciti.