Grahamstad hou van vandag makietie
2012-02-18 08:30
Port Elizabeth – Feesviering om Grahamstad se 200ste bestaansjaar te herdenk, begin vandag op dié geskiedkundige dorp.
’n Straatparade word vandag van 11:00 van Kerkplein deur Somersetstraat na Highstraat en terug na Kerkplein gehou.
Zamuxolo Peter, burgemeester van die Makana-munisipaliteit, het gesê die jaar sal gebruik word om ’n sterk gevoel van gemeenskap te bou sodat almal daartoe kan strewe om die munisipaliteit “’n goeie plek te maak om in te woon”.
Hy het verder gesê die hooffokus van die jaar is om al die inwoners aan te moedig om hul eie stories oor die dorp te vertel.
“Alle inwoners word aangemoedig om deel te neem om te verseker dat die hele geskiedenis van ons dorp ingesluit word,” het Peter gesê.
“Ons nooi almal om te besin oor hul eie geskiedenis en bydraes te lewer vir die verskillende temas vir die jaar,” het hy bygevoeg.
Die munisipaliteit gaan die historiese mylpaal vier deur middel van storievertelling, musiek, dans en verbeelding.
– Volg Nuus24 op Twitter
- Die Burger