Goeie kampplekke wag by Nelspruit
2010-09-01 08:49
Nelspruit is nie net ’n stilhouplek op pad Krugerwildtuin toe nie, die kampplekke hier is op sigself ’n besoek werd.
Twee van die kampplekke, Leo’s-woonwapark en Nature’s Gate, lê aan die buitewyke van die stad.
Leo’s is etlike kilometer suid van Nelspruit naby die R40 geleë.
Hoewel die laaste stukkie grondpad van die R40 slepers met duur woonwaens kan afskrik, is dié kampplek die moeite werd.
Die eienaars, Debbie en Eric Lowther, het reeds begin om tweespoor-sementblaaie te gooi om dit meer toeganklik te maak.
Diegene wat reeds tyd in die somer in Nelspruit deurgebring het, sal weet dat die kwik hier kan styg.
Kampeerders kan gelukkig hier lafenis vind onder die digte blaredak van bladwisselende pekanneutbome.
Die oord grens aan die Barberton-natuurreservaat.
Hou jou kamera byderhand, want nou en dan sluip ’n koedoe of ’n ystervark die kamp binne.
Verder is daar ook ’n speletjieskamer om die jongspan besig te hou.
Die ablusiegeriewe word gereeld skoongemaak en daar is genoeg warm water dat selfs die laatslapers ’n warm stort sal hê.
Die kamp het 24 grasbedekte staanplekke met elektrisiteit, maar as jy nie ’n woonwa kan bring nie, kan die personeel vir jou een van tien ingerigte tente opslaan.
Nature’s Gate lê nader aan Nelspruit, wes van die stad naby die N4.
Die kampplek word tans opgeknap.
Daar is op die oomblik 50 kampplekke, maar dit sal verminder na 20 luukse staanplekke wat groter en meer privaat sal wees.
Vakansiehuisies en permanente tente sal ook toegevoeg word.
Net soos Leo’s word die staanplekke deur digte bome teen die son beskut.
Die oord lê teen die Cairnrivier en daar is ’n dam waar jy groot- en kleinbekswartbaars kan uittrek as die geluk aan jou kant is.
Jy kan hier óf agteroorsit en die natuurskoon geniet, óf die hele dag lank besig bly.
Daar is ’n speelparkie vir die kleinspan en selfs ’n verfbalbaan.
Die kamp het twee afsonderlike ablusieblokke vir mans en vroue, asook ’n rolstoelvriendelike badkamer.
Al die staanplekke het kragpunte, behalwe vir ’n paar staanplekke aan die oewer van die rivier.
Lees meer oor hierdie kampeerplekke in die jongste uitgawe van die tydskrif WegSleep wat nou te koop is.
- Die Burger