Fotowenk vir blomme afneem
2011-08-30 10:33
Alet Pretorius, fotograaf by Foto24, skryf:
Baie mense is teleurgesteld met hul foto’s wanneer hulle pragtige plate blomme afneem. Wat hulle sien, vertaal nie so maklik in ’n foto nie. Maar met ’n bietjie beplanning en ’n paar wenke oor hoe om die taal van fotografie te gebruik, kan jou blommefoto’s bekoor.
Wanneer jy plate blomme afneem, is die kleur, die komposisie en beligting baie belangrik.
* Kleur: ’n Mens se oog en brein reageer op kontrasterende kleure en daarom is dit ’n baie doeltreffende element om in fotografie te gebruik.
* Komposisie: Soos in die meeste foto’s is die reël van derdes ’n goeie komposisie.
Jy kan ook die goue driehoek-komposisie gebruik. Trek ’n diagonale lyn van een hoek na die ander. Verdeel dan die twee driehoeke wat vorm weer deur ’n lyn van die ander twee hoeke tot op die eerste lyn te trek. Fokuspunte wat op hierdie punte val, sorg ook vir ’n treffende komposisie.
Kyk ook uit vir patrone, lyne en kurwes en gebruik dit om jou fokuspunt te beklemtoon. ’n Element wat ’n patroon breek, sorg ook vir ’n baie treffende fokuspunt.
* Beligting: Sagte lig is ideaal om blomme af te neem. Maak dus seker jy is op die regte tyd van die dag op die plek waar jy wil foto’s neem.
Die vroegoggend-lig is die laaste lig van die dag en werk perfek. Bewolkte weer versprei die lig eweredig en maak ook mooi blommefoto’s.
Blomme kan ook baie dramaties naby- of detail-foto’s maak. Belê in ’n makrolens of gebruik die makro-verstelling op jou mik-en-druk en gaan nader.
– Volg Nuus24 op Twitter
- Beeld